【娛樂新聞】《璀璨之城》陳曉華情緒崩潰連場戲 Hera親解角色複雜內心
.
熱播中嘅《璀璨之城》今晚（14日）一集，郭芷媛（陳曉華飾）得知情人官孝賢（張智霖飾）即將迎娶洪海允（高海寧飾）後，情緒徹底崩潰，連場激動戲份成為今集焦點。

劇中芷媛懷上孝賢骨肉，卻驚聞對方婚訊，深知做正室無望嘅她，激動踩上尚利鋒集團旗下酒店找孝賢對質。孝賢一臉冷酷無情咁說：「結婚有幾咁大不了，你可以繼續做我情婦，一切都唔會變。」當芷媛哭求他離婚後與她結婚，孝賢以極度理智嘅口吻直斥：「我用人係講功能性，洪海允做到嘅嘢，你根本做唔到。」佢更以「除咗情緒落手，你仲有冇第二招啊？」回應對方。

即使芷媛告訴對方懷孕嘅消息，明言不想兒子做私生子，孝賢依然無動於衷，更神還原父親官志琛（姜大衛飾）嘅霸氣口吻：「我話畀你嘅嘢，我一定做得到，但我話唔得，你諗都唔好諗！」隨後配以令人心寒嘅笑容，打發她回家安胎。

雪瑩（張曦雯飾）暗中挑撥芷媛情緒，使她出現在志琛（姜大衛飾）面前，此舉瞬間觸動孝賢嘅神經。極度討厭別人在背後搞小動作嘅孝賢連番質問，更狠心表示「我同你到此為止」。嚇得芷媛當場跪低，崩潰爆喊苦苦哀求：「我求下你唔好咁樣對我，我保證冇下次，你為咗我哋嘅BB，可唔可以留低呀？」

後來雪瑩施計令芷媛誤以為孝賢要逼她墮胎，憤而潛入對方嘅婚禮現場。她緊緊攬住婚紗渴望成為新娘子，情緒愈來愈激動說：「點解你要咁對我同我哋嘅BB呀？」、「你唔好再喺度做戲，你唔想要我同我哋嘅BB呀！」孝賢則說：「你睇下依家你似咩，就因為你咁，我先會同Alice結婚，就算佢從來冇出現過，我都唔會揀你。」

面對孝賢冷酷絕情嘅嫌棄，芷媛最終情緒失控，擸刀威脅：「如果你繼續同洪海允結婚嘅話，我就死畀你睇」、「我寧願死都唔想見到你成為第二個女人嘅老公」，孝賢卻依然冷靜，直指她這份不是愛而是佔有慾，表明關係正式畫上句號。芷媛一臉絕望、痛心，最終走上輕生之路。

今晚這幾場陳曉華嘅情緒崩潰戲演得不俗，將她對孝賢嘅愛和在這段關係嘅卑微，以及那份絕望痛心之情表露無遺，配合張智霖冷酷狠心嘅演繹，令場口更為精彩，獲不少觀眾力讚。

談到今次角色嘅複雜內心戲，陳曉華接受tvb.com獨家訪問時坦言，初時摸索角色有困難：「郭芷媛嘅感情比較複雜，佢係好愛呢個男人，但又唔可以話畀人知，每次見面都好珍惜呢個機會，嗰種患得患失，但同時又要保持女人味，我一開始係未拿捏到，但後期經過圍讀、同監製導演溝通，我開始明白郭芷媛個心態，知道要點進入角色。」

至於她最後自殺那一幕，她坦言看劇本已覺得很震撼：「拍攝前亦唔可以排好多次，因為排得多會麻目，同埋呢場戲有好多走位，所以拍攝已經度好晒所有位置，盡量希望可以一Shot落，對我嚟講係好好，如果斬開拍，我嘅情緒亦會被斬開。」另外，提到劇中她不乏喊戲，她說：「對我嚟講真係好愛一個人先會咁，去到後期角色精神好繃緊，所以好容易就喊出嚟。」
#TVB[超话]##璀璨之城# http://t.cn/AXlNc3zy