【娛樂新聞】曾比特閉關造歌回歸招牌慘情作品 MV搵小師妹幫手想加掌摑鏡頭 預告2027挑戰跳唱
.
曾比特（Mike）到西九龍出席音樂會活動，現場對談分享音樂生活，並即場獻唱作品《CHANGE》，獲大批「爆炸糖」現場應援。Mike話整個6月都在閉關造歌，專心錄音及寫作品，好耐冇見歌迷，若有工作都會出關。佢表示正製作本年度第5首歌，前一晚錄音到11點，問閉關會唔會Lonely，佢笑言都有少少孤僻感，心情同下一首新歌相符，係一首慘情歌：「因為收到歌迷DM，好耐冇聽到我嘅招牌慘情歌，同公司溝通後都覺得適合做一首容易入耳嘅歌，今次請到大師同前輩合作，加上之前做咗2首歌，而家有3首存貨。」

至於會唔會製作MV，Mike話同導演商討緊內容：「導演想我自己演，我推搪中，哈哈！（有女主角嗎？）會有，係公司嘅女歌手新人，相信會有新火花，因為我哋都未見過面。估唔到咁快有師妹，我都仲做緊小師弟！」佢又話因歌詞改咗，MV劇情想入肉啲，所以可能會加入被女主角掌摑嘅畫面，雖然想營造淒美感覺，但唔提倡暴力。

問到今年計劃，Mike話一直想開騷，但前題係作品夠多，因此今年目標係主攻大碟，目標出10首歌：「算完成一半，今年都進入下半年，要追趕進度！閉關分階段啦，怕閉關太長大家會忘記我，到時出歌都冇人聽。」佢指新歌計劃中有合作作曲、填詞嘅作品，想繼續做慘情歌同搖滾，都係自己風格鍾意嘅作品。問到會唔會挑戰跳唱，Mike笑言：「跳唱就唔好，等到2027吧，我說的，哈哈！」預告兩年後先挑戰跳唱，粉絲要耐心等待。 http://t.cn/AXS1tq5F