東張西望丨「香港小姐2026」12入圍佳麗見傳媒 1.63米李澤欣最嬌小 心理學博士顏懿菲最高學歷
.
《2026香港小姐競選》昨日（17日）正式公布12位入圍佳麗，佢哋以優雅輕熟女造型會見傳媒。今屆佳麗背景多元化，有臨時退選，亦有最後一刻順利入選嘅「幸運兒」。因為住公屋搭巴士而被傳媒稱為「貼地港姐」嘅10號陳梓穎（Cecilia），就係最後一位入圍者。佢透露工作人員一直打佢香港電話都打唔通，直到昨日打去加拿大電話先聯絡到佢，先知自己入圍，認真峰迴路轉。

首輪面試已成為焦點嘅2號李澤欣（Scarlett），憑清純氣質成功跑出，仲有貌似2019年港姐王菲嘅1號袁絲珩（Bernice）都順利入圍。李澤欣身高1.63米，雖然係12人中最嬌小嘅一位，但佢認為自己反而最突出，係絕對優點。6號盧蔚晴（Jasmine）同家姐一齊參選，但只有佢入圍，不過佢同3號李澄晴、4號譚雅文極速成為好友。Jasmine話家姐冇入選冇唔開心，會喺屋企支持佢，為佢加油打氣。

11號顏懿菲係最高學歷嘅入圍佳麗，佢目前喺城市大學讀心理學博士，8月就畢業，絕對係美貌與智慧並重。今屆多位佳麗身高超過1.7米，行Catwalk相當有台型，令人眼前一亮。12位佳麗將會接受連串訓練，為決賽備戰。 http://t.cn/AXaRBcO7