▪️腦筋上嘅犯錯，令到拜仁慕尼黑73分鐘要踢少個，奧利斯嘅紅牌改變咗場上局面，都間接導致球隊未能作客取勝。喺落後兩球之下，拜仁下半場幾乎佔據曬絕對優勢，若非踢少個都未必會最後時刻失守。夏利卡尼梅開二度，今季歐聯累計入球去到第三個，但係佢嘅把握能力可以再提高些少；佢哋最後時刻嘗試「插水」來拖延時間，結果被直接無視。

維京好注重利用對方嘅死球進攻後做出反擊，尤其係角球。喺攔截後作出快速嘅進攻，極具威脅。最後都能夠憑藉人數優勢，於法定時間最後一分鐘追和，佢哋值得呢一分。

▪️國際米蘭跨季4連敗，創下球會歐聯賽事紀錄。比錫克居右，艾簡積居中嘅三中堅配置表現值得商榷，中路嘅空位被對手運用得相當透徹。查漢奴古防守輸十二碼，想將功補過但係射門就中楣；勞達路馬天尼斯雖然梅開二度，但係就錯失最少另外三次黃金機會，包括一次單刀；史坦高域後備入替貢獻一次助攻；祖薛馬天尼斯（Josep Martinez）出迎派膠，時間選擇嘅錯誤係佢哋全場防守嘅一個縮影。

作為AC米蘭擁躉嘅車索迪（Nicolo Tresoldi）賽前講過，場波會係當「米蘭打比」嚟踢，亦都講到做到，個人大演帽子戲法，進一步受到三個國家隊主教練以及諸多大球會嘅關注！恩蘇瑪倒戈有唔錯嘅演繹，全場最少作出9次成功撲救，包括撲走「摸慣摸熟」前隊友勞達路馬天尼斯嘅單刀波。對比之下，國際米蘭球迷應該會幾掛住呢位瑞士龍門。

▪️近兩場賽事，艾迪達都展示咗下半場「撳制」嘅戰術，國際賽事後阿仙奴取得兩連勝。半場摸和，換邊後63分鐘開始發力，廷巴嘅處理相當乖巧；艾斯嘅最後一腳處理好冷靜；沙加入第三波之前，整體嘅組織都賦予層次感同細膩。

利爾上半場不失，土耳其守門員貝基奧沙（Berke Özer）有唔少功勞；上田 綺世上半場嘅入波被球證同VAR推翻，但係慢鏡頭就顯示唔出有咩問題，呢個判罰有點困惑；基奧特重返酋長球場並且喺77分鐘入替，獲得全場球迷唔少掌聲👏

歐聯第二比賽日賽事賽果Day 1 -
沙巴2-0 布拉格斯拉維亞
朗斯0-2 士砵亭
國際米蘭3-4 布魯日
加拉塔沙雷1-4 巴塞隆拿
馬德里體育會2-0 曼聯
阿仙奴3-0 利爾
RB萊比錫1-0 PSV燕豪芬
維京3-3 拜仁慕尼黑
維拉利爾3-1 拿坡里

#UEFA##UEFA Champions League#