是前天中午吧？还是下午？一友人私信发来一段视频，正是那天申花0-3北京国安赛后引发轩然大波的几名申花球迷围堵穿武磊红色国家队球衣的小球迷父子的内容。

紧接着，友人就打来微信电话。

友人：喂，娄啊，视频侬看到咯。。。申花球迷现在哪能侪变成搿种吃相了啦？太难看来！去围攻人家小朋友做啥啦？

我：哎呀，就是因为0-3输脱了呀。。。胸闷伐啦？窝煞伐啦？退场出来，突然看到有红衣裳戳了自家眼面前，还是7号武磊，心里厢更加齁势。。。

友人：齁势是肯定个，但是侬也弗好去对牢人家小朋友发泄情绪伐？哦，就因为人家穿了一件红颜色球衣？八万人体育场规定弗好穿红颜色球衣了？？？只好穿蓝颜色？？？迭个生活勿对呃伐。。。

我：哈哈哈，老兄侬可以呃，一枪头凿到腰眼，一句闲话喵牢总筋！八万人体育场当然勿可能规定讲进场观众只好穿蓝颜色勿好穿红颜色。。。但是，申花队比赛当天体育场以蓝颜色为主基调OK伐？呒问题伐？一年365天，申花主场比赛只有几天啦？对伐？所以，平常辰光侬想穿啥颜色进八万人侪勿搭界，有本事侬光勒嗨进来也勿搭界。。。问题是今朝我申花队主场踢比赛呀，侬cn穿件红颜色球衣算啥啦？挑衅咯？示威咯？成心搞事体咯？申花球迷当然也是搿能介理解呃。

友人长叹：唉，现在上海球场里看球哪能变成搿种样子了啦？？？我之前看到网廊厢讲侬假使穿了客队球衣进场肯定会得拨赶到客队球迷看台，当时辰光我就觉着老勿适意。我覅去客队球迷看台可以伐啦？我就想蹲了中立看台可以伐啦？难道现在球场里厢已经呒没中立看台了？人家西班牙联赛双方俱乐部主席还坐了一道看球来。。。

我：老兄又提出来一只好问题！阿拉个球场里厢，除脱客队球迷看台可以穿客队球衣，还有伐有其他区域可以穿？唉，难呀。。。我只好帮侬讲阿拉个看台区域划分是学习英超，双方球迷区域一定是泾渭分明清清爽爽呃。为啥啦？管理起来便当呀，球场里厢勿容易出事体。至于侬讲个啥中立看台，兄弟啊，侬迭个是三十年前个老黄历来。。。

友人：娄啊，侬晓得伐，我一直记得侬讲过呃美国人球场里厢双方球迷可以坐了一道，各人穿各人个球衣，大家有说有笑，开开心心。。。就像本届世界杯，每只球场里厢双方球迷，第三方观众混了一道排排坐，一道叫一道笑一道跳。迭个再是球场里厢看球个环境呀。。。阿拉呢？每场比赛侪弄得来想要你死我活，连小朋友也一道拨卷进来。。。

我：兄弟啊，深刻了哦。。。周立波讲呃：深刻等于促狭。。。只好怪阿拉勿好。。。转播了几十年个世界足球，尤其是英超，让大家以为球场生态就是迭个样子了。。。