呢條街相當多唔同種類嘅食店，被呢間門口裝修得幾精緻嘅餐廳吸引住，開頭以為係間西餐廳，睇埋門口食物相先發現係食越式菜。

佈局精緻，有套餐有散叫，價錢相當貼地。

見到有呢個二人套餐 ($298)，包頭盤，小食，主食及餐飲X2，就呢個餐啦。

頭盤四選二，牙車快沙律拼札肉米紙卷，一碟過上菜。

牙車快沙律係椰菜甘荀絲加鷄絲，簡單有咬口。

而札肉米紙卷，煙韌米紙卷包住生菜，青瓜甘荀及札肉絲，淋少少酸辣汁係中間，將清淡嘅味道變得惹味。

小食類係香口炸物，先有蒜香牛油鷄翼，肥嘟嘟，入口有熱度及脆度。食得出蒜香牛油味，一隻真係唔係幾夠喉。

另一樣係絲網春卷，切成四小段，有埋生菜包食。

爽口生菜包住香脆春卷，加少少酸辣汁一齊食，又係出色嘅。

主菜之一可選海南鷄飯，份量都唔少，甜豉油及薑蓉另上。

唔食鷄皮嘅可輕易分離，無骨啖啖肉，肉質好嫩滑; 配上有味鷄油飯，好味喎。

友人見餐牌有呢客咖喱脆皮牛腩飯，加配$35就可以食到。

咖喱汁另上，唔辣有淡淡咖喱香味; 脆皮牛腩外層係脆，牛腩偏瘦，帶點嚼口，將咖喱汁加持於飯及牛腩上，然後一啖食晒，幾滿足。

加配$18變成咸檸檬可樂，一飲超爽; 附咗特色凍飲，亦有港式凍奶茶，各色其式。

無加一服務費，梗加顯得呢餐相當抵食。