▪️「夫添」出戰嘅克羅地亞祭出平均年齡達29.7歲嘅主力陣容出擊，態度同目標都非常明顯，爭取擊敗對手以分組次名出線。而比賽過程亦都一如既往展露佢哋嘅堅毅同韌性，能夠行得越遠就越係超出預期。比列錫（Ivan Perišić）今仗直接以主力左閘身份亮相並且踢足全場，直到87分鐘先由加華迪奧爾（Josko Gvardiol）入替華錫（Nikola Vlašić）得以重返熟悉嘅左翼位置。克羅地亞嘅遠射頗具威脅，包括華錫、柏薩歷（Mario Pašalić）嘅重砲都係差之毫釐，而蘇錫（Petar Sučić）就射入一記相當精彩嘅「毒蛇躝草」。下半場有好一段時間佢哋嘅體能都到達臨界點，俾咗加納唔少機會，但係尾段又重新主導番比賽。

加納整體未如上一場對陣英格蘭般入局，半場調動之後兼食住「格仔軍」轉數下跌，搶番唔少優勢。中堅盧卡臣嘅死球墊射時機同處理得好冷靜，經VAR復桌後確定反越位成功，入球有效。

兩者齊齊晉級之後都係迎來硬仗，克羅地亞要硬撼葡萄牙，加納就需要挑戰勁敵哥倫比亞。

▪️夏利卡尼（Harry Kane）重拾射門靴攻入一球，成功打破前輩連尼加嘅紀錄，以11球成為英格蘭喺世界盃決賽週入球最多嘅球員。此戰杜曹有幾個變動，華舒福（Marcus Rashford）重返主力位置，佢亦係本場賽事最活躍、帶來有效及威脅性進攻嘅一個；收起迪勤萊斯（Declan Rice），將比寧咸（Jude Bellingham）拉後一格寄望踢得更進取更有攻擊性。但係比賽後昆沙（Jarell Quansah）嘅傷病令人擔憂，原本主力嘅列斯詹士（Reece James）已經傷停，接落來嘅賽事右閘位置可能需要史賓斯（Djed Spence）客串。

巴拿馬繼續有雙翼齊飛，不過對陣克羅地亞時滿場飛奔嘅（Cristian Martínez）就有點靜，相反左側嘅荷西洛迪古斯（José Luis Rodríguez）就有唔錯嘅演出。

世界盃分組賽賽事賽果-
Group L
巴拿馬🇵🇦0-2🏴󠁧󠁢󠁥󠁮󠁧󠁿英格蘭
克羅地亞🇭🇷2-1🇬🇭加納

*附L組分組積分排名

#世界杯[超话]##FIFA World Cup 2026# 🇺🇸🇨🇦🇲🇽#世界盃分組賽##英格兰球迷俱乐部[超话]##克罗地亚球迷俱乐部##加納球迷俱樂部##巴拿马球迷俱乐部[超话]#