莫家淦視翟威廉做報名中聲4啟蒙人 梁敏巧鄧伊婷向港姐師姐派貼士

莫家淦、梁敏巧、鄧伊婷 同 翟威廉 日前現身一個以慶回歸作主題，由香港同內地合作嘅川渝畫展，四位都覺得活動意義非凡。

喺活動上獻唱嘅Keith就話，威廉係啟蒙佢報名參加《中年好聲音4》嘅人，因為當年威廉搞「Happy Live」搞得好成功，一個人已經可以變成一個音樂搖籃。威廉都好開心見到Keith有而家嘅成就，亦好難忘當時Keith出新歌，自己係喺旁邊親耳聽住佢唱。

被問有冇興趣參加歌唱比賽，威廉就話自己冇呢個興趣，Keith笑言，威廉更適合參加配對計劃，仲話佢唱歌功力唔夠同女仔溝通功力叻。

《2026香港小姐競選》嘅12位候選佳麗已經出爐，而家更密鑼緊鼓進行外景拍攝。Maggie同伊婷作為師姐，都有貼士想俾一班小師妹。

Maggie就話，最重要自然大方就足夠，因為觀眾喜歡真實感，見到一個藝人方方面面係一個點樣嘅人，唔只睇樣，所以盡量表現到自己最真一面就得。
伊婷亦表示，自己鍾意睇港姐真實一面，仲對上一屆用Rap吸睛嘅佳麗，認為呢種都係一種特色。佢仲話睇過唔少佳麗們嘅面試片段，有啲佳麗都好努力，覺得佢哋唔需要害怕。

唔少香港人都鍾意假期到內地吃喝玩樂，Maggie同伊婷都唔例外。Maggie就好建議大家去內地唔同地方感受文化，甚至可以去食去玩感受內地嘅軟實力，同埋進行交流。伊婷之前都有喺內地拍劇，佢就好鍾意一瞓醒就可以叫外賣，而且價廉物美，坐車又便捷，所以一切都好方便。