本周一晚上，老娄和多位老友欢聚，话题自然离不开世界杯。

一见面，S就拉着我问：娄兄啊，搿趟美国人办世界杯蛮结棍呃，几只球场漂亮得来。。。我听佴解说讲洛杉矶只球场造价要50几亿美金？介吓人啊？？？

我：呵呵呵，迭个倒是真呃。。。洛杉矶迭只球场我去过呃，是本届世界杯所有球场里厢最新个一只，2020年刚刚投入使用。伊为啥造价介高？因为离洛杉矶机场近，好像只有5英里还是5公里，所以建筑高度受飞行高度限制，只好往地底下挖。迭个生活一记头上难度来，往下头挖100英尺，差勿多30米伐。。。

J一下被惊到了：啥么事？往地底下挖了30米？迭个弗是造球场，简直是造地铁。。。

大家都笑。。。

Y也加入进来：老娄啊，我昨日刚刚从美国回来，看了三场小组赛。英格兰--克罗地亚，蛮灵呃蛮灵呃。伊只球场，达拉斯体育场，里厢只高清大屏挂了球场顶廊厢，绝对弹眼落睛！

我大笑：哈哈哈，兄弟啊，达拉斯迭只球场我也去过呃呀。。。2011年2月份，我坐了里厢解说超级碗。迭只球场20年前开工个辰光造价就已经是15亿美金来。。。三大卖点：1，顶棚开关是沿牢房顶廊厢个弧形轨道朝两面打开。2，2009年开放使用个辰光看台观众容量超过10万人。3，就是侬讲个迭只高清大屏，正反两面，49米x22米。左右两面还有两块小个屏幕。侬晓得伐，2009年装上去个辰光，屏幕清晰度已经是1080P了。。。最吓牢我个是迭个老鬼三600吨重！！！就搿能介挂了房顶横梁廊厢。。。

众人一阵唏嘘。。。

S又问：娄啊，美国弗是交关地方公共设施年久失修，一塌糊涂吗？哪能掿出来个世界杯球场倒是蛮登样呃嘛？

我：迭个完全是两桩事体。。。地方公共设施建设归政府部门管，世界杯球场完全是私人老板个产业。美国搿趟一共11只世界杯球场全部是NFL职业橄榄球队个主场，投资建设维护全部侪是球队老板出钞票。刚刚阿拉讲到个洛杉矶球场就是洛杉矶公羊队老板克伦克投资，哦对了，也是英超阿森纳队个老板。达拉斯球场是属于达拉斯牛仔队，老板Jerry Jones也是美国国内最著名个体育大亨，当年球场开张接受媒体采访个辰光曾经讲过伊自家从小个梦想就是——有朝一日自己的球队在十万观众面前大显身手！

J：老娄啊，个么伊拉迭眼球场赚钞票伐啦？

我脱口而出：当然咯！nfl橄榄球联盟是全世界最赚钞票个体育联盟！去年个数据，32支球队，272场比赛，场均观众毛7万人。电视转播权就更加弗谈来，每年超过100亿美金！

Y一声叹息：cn，怪勿得搿趟世界杯门票卖了介鉅。。。 http://t.cn/AXSC5kuj