【娛樂新聞】姚焯菲姑媽驚喜現身活動中獎 紐約讀書難忘深夜衝去打邊爐
.
姚焯菲（Chantel）今日（24日）到銅鑼灣出席護膚活動，同場仲有曾參加《全民造星VI》嘅姚浩銘擔任男模特兒。Chantel為姚浩銘塗上品牌護膚泥，其後活動進行抽獎，點知中獎者竟然係Chantel嘅姑媽。姑媽見到自己中獎時大感開心，笑到見牙唔見眼同姪女影合照。姑媽雖然打扮低調，但右手戴住一只約值12萬嘅鑲鑽勞力士Lady-Datejust腕錶，同時手挽一個約值3萬幾嘅Hermès Garden Party 30手袋，貴氣十足。

Chantel大讚品牌嘅泥膜非常好用，佢話除咗敷面膜之外，會盡量迫自己12點前瞓覺同飲大量清水。講到姑媽驚喜中獎，Chantel直言意想不到，佢話知道有幾位親友到場，但完全唔知佢哋企喺邊，抽中姑媽嗰陣真係好開心。

提到要為演唱會準備，難以達到12點瞓覺嘅目標，Chantel話：「我盡量希望排練喺12點前完，開騷嗰日就一定遲。」佢話返香港之後休息時間比較少，喺美國就好早瞓，從來唔會溫通宵。佢仲話宿舍同學好多時都玩到好夜，得佢同幾個同學比較養生早早瞓覺。Chantel自爆有一次出夜街，係因為同同學傾起打邊爐，有人提起海底撈，於是興起一齊搭車去唐人街嘅海底撈打邊爐：「我係冇食過，啲同學好驚訝，之後就話即刻去！但當時係12點！其實好少咁做，crazy咗一次！」佢話另一件難忘事係見到落雪，當時喺圖書館溫完書，行出門口見到落雪，公園變成白色森林，好開心，不過幾日後溶雪變灰灰黑黑就即刻唔鍾意。佢話新歌MV嘅雪景係喺學校距離2至3小時車程嘅地方拍攝，絕對唔係AI製作。

問到演唱會進度，Chantel話一切都係初步構思中，但歌曲上會揀一啲高難度作品，希望讓人見到不一樣嘅Chantel。問到會唔會考慮學詹天文染金毛，佢話唔會考慮，因為覺得染其他顏色會好奇怪，自己從來冇試過染髮。
#TVB[超话]# http://t.cn/AXSS8gwu