【娛樂新聞】吳啟華演控制狂父親拒真摑戴祖儀 爆曾遭劉德華整蠱累被導演狂鬧
.
監製王心慰喺無綫嘅告別作《非份之罪》，將於6月29日（周一）晚上8時30分首播。劇集以六個單元故事構成，日前（23日）一眾演員吳啟華、游嘉欣、朱敏瀚、陳煒等齊集將軍澳電視城出席宣傳活動。

吳啟華、游嘉欣同朱敏瀚合作演出打頭陣嘅單元《無臉女屍》。吳啟華今次係為咗支持老友監製王心慰而接拍，劇中飾演一個立家規控制妻女嘅控制狂父親。不過佢現實中同子女相處就完全冇呢一套，主張同仔女做朋友。佢大讚劇中飾演佢女兒嘅游嘉欣「冇得頂」，演技好又靚女。對於劇中怒摑戴祖儀一幕，吳啟華強調絕對冇真打，亦從來唔支持真打，認為演員唔應該受傷害，靠演技就足夠。

游嘉欣就話同吳啟華對戲好有代入感，聽佢講對白時完全唔似演戲，感覺好親切。問到係咪視對方為「程至美醫生」，佢笑言「既是爸爸也是醫生」。

朱敏瀚劇中同游嘉欣演情侶，有浪漫吻戲，似校園青春片。佢遺憾同吳啟華對手戲唔多，只有幾場衝突戲，但可以喺對方身邊吸收經驗，笑言「好快收工」。吳啟華就笑指朱敏瀚同佢一樣咁靚仔。

吳啟華仲自爆當年新人時期嘅瘀事，話同劉德華拍戲時，對方整蠱佢偷偷抽走佢嘅頭飾，搞到佢拍到一半被導演發現，被鬧得好勁，但佢當時只係新人，唔敢講出嚟。

另外，朱敏瀚早前承認同陳曉華分手，佢話近日忙於宣傳《飛常日誌II》及《非份之罪》，現時專注工作。對於有指佢聽話接受「禁愛令」先至多工作，佢否認從來都冇「禁愛令」呢回事，話自己而家「同工作發生濃烈的感情」。
#TVB[超话]# http://t.cn/AXS66ptw