【娛樂新聞】陳凱琳《乘風2026》榜尾晉級未氣餒 感激鄭嘉穎一拖三撐頭家
.
陳凱琳（Grace）今晨專程從長沙坐高鐵趕回香港，出席美容品牌新產品限定店開幕活動，向粉絲分享打造光滑美肌迎接盛夏嘅心得。聽日（23日）就係Grace 35歲生日，一班粉絲現場甜蜜地為佢唱生日歌，送上粉紅色鮮花、蛋糕同禮物，場面溫馨。

Grace受訪時甜笑話生日願望同往年一樣，希望一家人身體健康。由於後日要返長沙繼續《乘風2026》（浪姐7）總決賽拍攝，所以慶祝活動會一切從簡，喺屋企食飯就算。日前父親節，Grace未返港未能同爸爸同丈夫慶祝，不過鄭嘉穎就安排母親、岳丈岳母同三個仔一齊過節，三個仔仲親手用中英文寫心意卡送畀嘉穎，Grace就用視像電話向父親送上祝福。

講到大仔Rafael就讀華仁小學嘅情況，Grace話佢逐漸適應，對中文學習興趣大增，心意卡用中文書寫已經係最好證明。對於有報道指嘉穎曾想為大仔轉校，Grace就話暫時未有打算：「暫時佢都幾好，會繼續keep住喺到。個人學習進度有進步最重要，我哋好少同其他人比較。」至於二仔同三仔嘅學業，會視乎適應力安排最適合嘅學校。暑假剛開始，Grace計劃一家五口7月底去旅行，慶祝二仔同嘉穎嘅生日，但因為細仔搭長途機比較吃力，所以會揀鄰近香港嘅地方。

講到《乘風2026》以第23名晉身總決賽，Grace話拍攝日程好忙，剛好休假日撞正生日先返香港。對於「乘風值」得48點排榜尾，佢笑言會繼續努力：「對我嚟講行到呢一步已經好唔容易！我亦都係大灣區嘅唯一代表，上次喺舞台唱幾句粵語歌，我都覺得好有代表性！粉絲見到我有個人嘅舞台覺得係一個好美麗嘅ending，總決賽希望畀自己一個冇遺憾嘅最後舞台！」

Grace更透露三個仔都好想去長沙探班，但佢擔心綵排太忙冇時間陪佢哋。大仔喺視像通話中甜蜜撒嬌話「媽媽真係走得好遠呀」，令Grace好唔捨得。佢特別感激鄭嘉穎喺節目製作期間專心照顧小朋友，成為最大功臣：「唔係幕後功臣，而家幕前都係佢！」講到嘉穎今年工作安排，Grace話丈夫仍然會專注撐起頭家，照顧小朋友生活同讀書。至於會唔會追第四胎，Grace笑言未有實質計劃：「而家專心去令三個小朋友有一個好嘅環境，希望佢哋讀書搵到一個方向。」

Grace日前分享同洪永城昔日拍劇點滴，坦言回憶時有啲失落，以前好多相處同共渡患難嘅時刻都好懷念。因為時間未能配合，佢暫時冇計劃接拍影視作品，但就話若果工作時數唔長，都會考慮接演內地或香港作品。佢好感恩呢三個月屋企支持佢，畀佢可以「好自私咁追自己夢想同事業」，之後會陪屋企人多啲。
#TVB[超话]# http://t.cn/AXSGOzNG