今日係6月16，咁就過咗一個月。

呢一個月入面，我病咗、又肥咗，而家終於好返好多，想簡單分享一下，我開 show 前後嘅感受。

開show前，對我嚟講，呢個係一個我放低咗十幾年嘅紅館夢。除咗我自己高興之外，竟然原來仲有好多人都替我高興，因為佢哋都曾經等過我開演唱會。喺我最好嘅時間，送咗我一份最好嘅禮物。

而開完 show 之後，我感受最深嘅，係好多人都話睇到我嘅努力，覺得我對得住「上紅館」呢件事。當我見到我嘅歌迷寫到，無論係以前定係今次，都曾經被人笑，笑佢哋點解會鍾意我、點解會去睇我演唱會，多謝你哋嘅堅持，我真係好有感觸。

我想多謝所有有關注過呢個 show 嘅人，更加多謝一路以嚟支持我嘅每一位。每個人嘅人生軌跡都唔一樣，我諗我自己係屬於進步得比較慢嗰種，但至少，一路走嚟，我都有喺唔同方面、唔同階段，慢慢進步緊，對得住一直支持我嘅你哋。

多謝一路由show up 到 perfect moment 參與過嘅所有團隊，多謝幫過我嘅每一位嘉賓朋友，成就我嘅紅館夢，創造一段又一段美麗嘅回憶。要多謝我契媽 Christine Samson 老師呢兩年嚟嘅教導、多謝我屋企人、我嘅朋友，同埋我「好歌有好報」嘅歌迷。

夢想係可以暫時放低，但唔好放棄。

正所謂條條大路通羅馬，有時只係行遠咗、行耐咗，遲到都總好過冇到。唔好放棄，當有機會試嘅時候，就盡量去試。就算結果未必係你最初預期，但喺過程入面你所得到嘅嘢，可能早已經值回一切，賺咗㗎喇。
#方力申[超话]##方力申最佳时间演唱会2026##itsawonderfonglife#