【ins更新】#20260406# .
廿幾年前，去倫敦為拍電視台旅遊特輯嗰陣，其中一個行程，就係去拍一間 old school 嘅英式餐廳，試食完我覺得都唔錯喎，就同自己講「我一定要同阿邊個邊個嚟食一次」。

然後，呢20幾年，同阿邊個邊個去英國旅遊咗無數次，結果都冇去食到呢間餐廳，點解呢？好簡單，因為拍攝當日係點到點車入車出，我冇認路，嘗試記低餐廳個名，但又唔記得咗，倫敦咁大，梗係搵唔返啦。而且又真係四圍行行咗咁耐街，都冇見返呢間餐廳。

所以我一直都覺得欠咗阿邊個邊個一餐飯，唔係，我應該話，嗰一餐飯，嗰一餐喺特定嘅時空有特別意義嘅一餐飯，而唔係某一餐飯。講真都係有少少遺憾。

終於，幾年前，竟然俾我唔小心撞返呢間餐廳，因為我認得佢個門口，同埋佢嘅格仔瓷磚地板。。

但係有但係。

點知因為COVID嘅關係，呢間餐廳頂唔住，喺我撞返佢之前嘅冇幾耐，啱啱執咗笠。即係終於搵返個門口，但係唔入得。即係終於搵返個friend，但係已經遲咗一步，佢啱啱釘咗。

小遺憾繼續係小遺憾。

上兩個禮拜，諗唔到去邊度食飯，上網攞吓靈感，突然之間俾我發現，舊老闆決定重開老店。

即刻同阿邊個邊個去食。

咁二十幾年前嘅回憶又有冇呃我呢？嗱老老實實，又未至於好食到飛天嗰隻，但絕對係水準以上嘅，而且如果你想食個氣氛食個格局嘅話，佢點都唔會辜負你嘅。

不過對我嚟講以上都唔重要啦，長年累月千山萬水失而復得，仲想點？

（ 另外想介紹返，配樂器王菀之 @wongyuenb 嘅「皇后餐廳」，方大同作曲，唔知你有冇聽過？唔知你記唔記得？唔知你有冇我咁鍾意。？ ）