【ins更新】#20260326# .
每日講少少 《 The Protégé 》

本來呢張唱片的情歌擔當並唔係《 用背脊唱情歌 》，而係呢一首法蘭先納杜拉式懷舊氛圍嘅 Navy ，唔係我揀嘅，我哋嘅合作方式一向都係湯先生負責揀旋律，我就想辦法寫到最適合佢，no questions asked。

事實上， 《 你都不知道 自己有多好 》之後已經開始寫緊呢首，而且已經寫咗兩段。突然之間有一日，湯先生打電話嚟：「你 hold 住唔好寫 Navy 先，因為噚日返公司開會，同事大比數咁揀咗另一首做主打，你都係寫咗嗰首先啦。」

我一聽 demo ，秒回：「呢首，梗係呢首啦，Navy 都好好聽，不過，我都唔識點講 ⋯⋯ 總之一聽就知知道，梗係呢首啦。」

最邪嘅係，之前湯先生 send 咗一大堆 demo 俾我，佢話裏面一早已經有呢首歌，但係我唔知點解陰差陽錯，開嚟開去就硬係就冇開到呢首出嚟聽⋯⋯

總之，如果你鍾意 《 用背脊唱情歌 》，其實除咗所有有關嘅音樂人攞咗個心出嚟，今次唱片公司嘅 A & R 都發揮咗佢哋「抉擇的力量」。

題材方面，《 碧麗宮 》想寫乜嘢其實一早同 Gareth 傾好咗，反而後來突然要寫嘅《 用背脊唱情歌 》其實係由構思 Navy 題材嘅過程裏面，湯先生嘅一句無心但好感動到我嘅說話衍生出嚟嘅，所以可以話 《 碧麗宮 》其實係《 背脊 》嘅老豆或者大佬，因為係由佢嘅一條肋骨變出嚟嘅。

咁到底嗰句說話係乜嘢？

《 碧麗宮 》本來亦唔係用呢間已經執笠嘅美好時代戲院做歌名嘅，咁佢本來嘅歌名又係咩呢？

今日講住咁多先，麻煩大家去聽唱片先。我哋每日講少少，聽日會講吓第二啲先，但過幾日又會再答返呢兩個問題。

@gareth_tong