#毛舜筠[超话]#
轉載自娛壹FB
專訪丨林日曦Ｘ毛舜筠 講真話
「我以為佢嬲，原來佢block咗我」
從網友到「姊弟」 腦毛世一
一段緣份 一次封鎖 幾番死撐
這是一個關於誤會、緣份、死撐——#林日曦（#腦細）和 #毛舜筠「唔識放過自己」的故事。
腦細：「你叫我咩都得——林日曦又得，阿曦又得，曦仔又得，你鍾意乜都得。」
毛姐：「咁我叫你曦曦。」
一個永遠覺得劇本未夠好的創作人，觀眾未開售就盲買飛；一個是從影半世紀的影后，首部舞台劇不是揀演技大師班合作，自認粉絲的毛姐揀中了林日曦。#腦毛世一，合演一齣有 #粵曲 元素的 #舞台劇《#大死撐日》。而且，其間腦細被毛姐「唔小心」封鎖了。聽起來夠晒奇幻，但這是真實發生。
01丨機心：由網友到拍檔，迂迴曲折
腦細一直渴望跟毛姐合作，幾年前開始部署——叫同事邀請毛姐來看他的演出。「我就可以觀察究竟有冇機會，你睇完冇乜聲氣，自然會fade out。」
但毛姐反應出乎意料，腦細膽粗粗，下次又請、下次又請。直到2024年覺得是時候，親自WhatsApp毛姐：「一直想找個機會可以跟你合作，所以鼓起勇氣向你作出邀請，來當我劇中的家姐（當然係女主角！ ）...如果任何原因未適合參演舞台劇，完全冇問題，唔使有任何負擔，唔使交代原因，點都好，祝你新年快樂，來年生活愉快。」腦細讀出當日的邀約，自讚：「仲有個笑面🙂社會生活滿分，原來我都幾有禮貌！」
腦細小心翼翼呈上一個幾年前寫下的劇本，然後開始等，由一日等到三個禮拜。「途中我仲講佢壞話，喺太太面前話：『毛姐唔接咪直接同我講囉，諗咁耐。』太太話：『人哋梗係要考慮㗎啦。』好啦好啦，我又繼續等，唔知等咗幾耐，終於收到回覆，我好開心。」
02丨誤會：「你起咗我底？」其實我完全唔知
毛姐答應的原因很有趣：她搞錯了。「我以為佢寫咗一個為我度身訂造嘅劇本。我問佢：『你係咪起咗我底？』佢話：『吓？』」
原來毛姐在粵曲家庭長大，腦細寫的劇本，女主角背景竟與她極為相似。腦細說：「我完全唔知。我只係想做一個有粵曲元素嘅喜劇。呢個係緣分，咁啱得咁蹺。」劇中兩人飾演姊弟：「為頭家好勞心勞力嘅家姐，吊兒郎當、搞大頭佛嘅細佬。」
03丨憎粵曲：由細打冷震，最後卻成為組裏擔當
毛姐卻說：「其實我根本好憎粵曲，由細到大，一聽到就打冷震。」偏偏在TVB時期，有人發現她識唱，叫她參加比賽，她贏了。爸爸從此希望她繼承衣缽，她越聽越驚：「成日覺得好似好快變咗做老人家嘅嘢。」
所以當腦細遞上劇本，她心情複雜。腦細請了粵劇顧問，顧問以為全組零背景，誰知毛姐一開口，顧問都被嚇親。兩人談粵曲如數家珍，腦細坐在旁邊「扮明」。
腦細解說劇名：「人類好容易有情緒，但人又好忙，唔得閒唔開心，有都收埋唔想講，我會稱之為『死撐』；過往做咗好多唔同創作，但去到而家，剩返最想做、做唔厭、做唔悶嘅——都係舞台劇。真係死撐，好辛苦。我唔係讀演藝出身，每一日都係學緊。就算觀眾鍾意，我都覺得好核突、好差，仲有好多嘢可以改。」
腦細分享「死撐得最勁」的一次。幾年前《大MK日》，他想跟白只、楊偉倫一齊一字馬。「三個都話OK，其實大家都唔OK。」他下載app日日拉筋，然後有一天——「啪。」斷筋。
04丨消失：兩三個月唔見人，抌咗十幾個故仔
毛姐答應演出後，腦細竟要由頭寫過。他消失了兩三個月，抌掉十幾個故仔，沒有一個夠好。毛姐從冇催他，但越唔催他越驚。
毛姐終於send message——講其他嘢，但其實就係催。他夾硬寫咗一個版本，然後她冇應他。超過一個月。「我心諗：『毛姐終於嬲。』正常人係應該嬲。」他用一個禮拜衝破極限，想到一條新橋。
05丨封鎖：「我以為佢嬲，原來佢block咗我」
終於有日，腦細收到message。「原來佢唔係嬲我，係block咗我——唔小心。」毛姐嘆氣：「唉！佢成日都唔信我。」那兩三個月，她每天睡醒就看電話，有一次在半夢半醒之間，她active了腦細的account——自己完全不知道。
後來朋友告之開始賣飛了，她收不到通知，連忙search「林日曦」，發現一個被封鎖的account。腦細說：「我以為你嬲咗我，反而激發我一個禮拜內完成晒。」毛姐話心急，劇本和歌一次過send給她。
毛姐坦言，當初答應演出前有掙扎。她曾有兩次舞台劇機會，最後都做不成。「我覺得舞台劇可能對我嚟講，係一個『我唔可以做嘅嘢』。」但這次不同。「我同自己講，點都要試咗呢一個，我好希望係同林日曦合作。」腦細知道毛姐的「宿命」後，做了一個決定：「我哋今次唔簽約。」打破那個循環。
06丨死撐：婚姻30年嘅真實體會
毛姐分享最難死撐、又無法放手的情況：婚姻。「死撐而你知道唔可以放手，呢個最難，而你冇得揀。一定係婚姻。因為你唔會30幾年都快樂。呢啲係謊話——如果我話你聽我好開心，嗰啲就係死撐，假嘅。」
另一個層面，是對自己的苛刻。58歲憑《黃金花》奪得金像影后，她說：「我好憎話到咗呢個年紀自己就成功。其實好多嘢都失敗。」女兒也說她苛刻。「我希望有一日學到——就係唔使對自己咁苛刻。」
07丨太太：最冷淡嗰個，但冇佢搞唔掂
問到太太對他的支撐，腦細說：「佢梗係第一個，冇佢搞唔掂。但個劇內容創作呢，問佢就『死』㗎啦，最冷淡嗰個。問親就『唔好問我啦』。」
2020年結婚十周年前夕，他寫下一段告白：「十年後，我變心了——變得比十年前更愛你。……ok對撚唔住，係我柒唔啱撚。」
🔶本文未完🔶Patreon會員睇足本🙏
📍藍帶烹飪點解令毛姐「日日惶恐」📍佢點樣用「生仔」嚟比喻死撐📍腦細最鍾意/唔
鍾意自己邊方面性格📍「癲喪仔」粉絲哲學
#娛壹
