又係分享做司儀主持小心得嘅時間。

我發現有啲主持介紹完某啲重要嘉賓上台講嘢之後，
就會即刻返去後台匿埋，或者坐埋一二邊。

我嘅建議係唔好即刻閃，盡可能都喺台側企一陣，
因為：

1 好多時嗰個老闆或者嗰位嘉賓一上台之後，
都會同你打個招呼，例如：
「唔該晒今日我哋嘅主持阿Bob！」
又或者會講啲嘢同你有關，例如：
「Bob頭先出嚟反應好好，可唔可以都俾啲氣氛我？」
咁如果你喺台側，最起碼都向佢點個頭，
笑一笑，俾返啲回應同反應佢，
如果唔係佢就變咗好似同空氣講嘢咁。

2 有時又會出現個老闆或者嘉賓支咪唔知點解冇開到，
咁呢個時候你都可以即刻衝上去換你枝咪俾佢，
唔需要個後台音響工作人員等panel指示上定唔上，
因為等多兩三秒，個老細就喺台上面尷尬多兩三秒

3 未必要聽晒佢講嘅所有內容，只要搵到當中一兩句，
然後到你上台請走佢嘅時候，你可以講返出嚟，例如：
「我好鍾意頭先老闆講嗰句，做人唔可以怕蝕底，我…..」
當你做到咁樣去Recap返少少嘅話，
老闆一定高興，你令到佢知道你有留心聽佢講嘢，
其他在場人士都會暗地裏覺得呢個司儀有啲料到，
點解佢哋會有呢個感覺？因為好多主持人都冇咁做，
你肯做嘅話，你就俾其他人突出咗少少㗎啦。

希望大家鍾意今日我呢個小分享啦。