突然，有啲嘢想講。

最近因為宣傳緊馬來西亞賀歲片《媽媽又要嫁》，
每日除咗出席各大小宣傳活動、訪問、謝票之外，
車程與車程之間，大部份嘅時間都係拎住部手機，
喺網上面回覆大家嘅DM同埋唔同平台嘅post同留言。

然後，最多人同我講嘅說話，就係：

「過年嗰幾日，我都想買飛睇，但係好多都爆咗！」
「你哋嗰啲場次，唔算好密，冇咁方便夾時間！」

然後我上網睇吓啲資料，再比較一下唔同戲院，
我發現我哋嘅場次，真係比其他嗰幾套戲都少，
嗰啲Hall又好似真係冇其他嗰幾套戲咁大嘅。

好彩嘅係喺年三十晚、大年初一二嘅入座率非常好，
所以某部份戲院就特別加多少少場次俾我哋，
不過都唔係嗰啲可以坐到二三百個人嘅大Hall。

我係絕對明白嘅，比起其他兩套本地大馬賀歲片，
我哋又唔係經典IP，又唔係上年賀歲票房冠軍，
我哋三條友，可以話係接近冇任何嘅數據支持，
再對比另外幾套香港同內地嘅大卡士大製作，
《媽媽又要嫁》可以話完全係蚊髀同牛髀，
如果我係院線老闆，我諗我都會咁樣做。

所以，我突然又覺得，喺呢個先天缺陷因素嘅情況下，
呢一刻，我哋竟然都可以去到300幾萬馬幣票房，
我想講，其實都已經算係幾叻仔㗎啦！

喺度都要同嗰啲想入場支持我哋嘅觀眾講聲，
因為場數比較少而令到你哋少咗選擇去夾時間睇，
亦因為個Hall比較細令到你哋要坐最前嗰行最邊個位，
衷心同你哋講一聲：

「對唔住，好抱歉🙏🏼🙏🏼」

我相信，只要院線見到我哋嘅入座率可以繼續維持到，
佢哋就會慢慢開放多啲場次俾各位觀眾去選擇，
亦都會開放一啲大少少嘅Hall等大家坐得舒服啲。

所以，希望仲未睇我哋套戲嘅朋友，買張飛去睇吓啦，
已經睇過又覺得可以帶未睇過嘅親朋好友去睇多次嘅，
唔好諗啦，幫幫手，帶佢入去睇多次啦！

多謝所有已經睇咗一次、幾次同未睇嘅朋友，
有冇奇蹟嘅出現，就靠你哋啦，唔該晒，麻煩晒。