《聲秀》4強得獎後首登東港城演出　導師胡鴻鈞泳兒助陣力撐
.
歌手胡鴻鈞（Hubert）與泳兒今日（9日）出席東港城舉行的「東港城X miffy星河祈願之旅」，同場還有《聲秀》冠軍馮熙夑（Ryan）、亞軍柯雨霏、季軍胡子貝及殿軍穎喬，以及新鴻基地產（銷售及租賃）代理有限公司董事鍾秀蓮小姐。

作為《聲秀》導師的Hubert笑言今日見到學員有種老懷安慰之感，又透露今日抱恙出席：「因為最近綵排音樂劇，有幾個演員病咗，依家大家都有咗抗體就唔怕之後再病。」他指音樂劇將於12月初演出，現時一星期排足6日，由於今次是他首次演出音樂劇，心情緊張：「要唱歌仲有少少跳舞，音樂劇唱歌同我平時唱流行歌唔同，要有調整，係一個新嘗試，好多謝導演咁有勇氣畀我加入演出，我會比心機，希望唔好拖累大家，因為同劇其他演員都係專業舞台劇演員。」另外，講到其主演的電影將上映，Hubert坦言已是數年前拍攝，見到終於上映大感開心及期待：「我當年要喺好短時間操練成輕量級拳手身形，我都已經盡咗力。（依家仲有冇當年身形？）依家有，但肌肉冬眠咗。」

至於泳兒見到學員感開心，問到何時舉行謝師宴？她笑言：「班學員想約食飯，佢哋好有心，不過佢哋唔敢開口問我時間，而係問我助理。」她坦言由於之前忙做導師，連男友也有微言：「佢有詐型，佢話你依家終於有時間，所以我會同佢一齊去旅行補數。」講到年尾的頒獎禮，她稱不太在意獎項，因為控制不了，她只想做自己喜歡的作品。泳兒又自爆最近險被詐騙：「我收到個SMS話係樓下住戶陳小姐，話我最近好嘈，已經錄咗音，叫我WhatsApp聯絡佢，佢會發條錄音畀我，我初時都有啲心虛，因為我隻狗好多嘢講，不過我另一半知道就話個內容唔正常，我跟住問管理員，原來好多住戶都收到類似信息。」她自嘲真的有少少蠢，幸好另一半精明，問對方是否嫁得過？她笑謂：「嫁佢唔會畀人呃，畀佢呃就OK。」

聲秀4位得獎者完成比賽後首接商演，他們稱感覺新鮮，加上沒有比賽壓力，心情輕鬆不少，稍後會為台慶及慈善活動演出，問到Ryan決定如何運用獎金？他說：「我諗住好好儲起佢，因為之前學唱歌都花咗唔少錢，經濟上有啲拮据。」但承諾一定會掏腰包請眾學員食飯。之前呻窮的柯雨霏坦言也想賺外快，但最近忙台慶綵排未有時間做兼職，而穎喬有意學電結他增值自己，而胡子貝在決賽中以Supper Moment的歌曲《無盡》參賽，獲對方在社交網留言鼓勵，他開心表示：「好榮幸，冇諗過佢哋會留言畀我，我會繼續努力。」

而藝人陳懿德（德德）擔任大會司儀，提到早前她主持《聲秀》決賽時頻出錯捱轟，今次再做主持，她稱沒有心理壓力，希望自己做得更好：「我自己都沉澱咗好耐，唔知點面對大家，但收到好多人嘅鼓勵，今次係好寶貴嘅經歷，我會做一個更謹慎同無忘初心嘅主持，希望之後畀大家見到我嘅進步。」她感謝獲得客戶支持及對她有信心，今次邀她擔任司儀。

德德表示有檢討自己當晚缺失，自言並非準備不足，而是當宣布季軍時燈號出錯，加上自己未有留意票數高低，只依賴燈號以致宣布錯季軍得主，但她承認自己是最後把關者，責無旁貸，承諾會更加謹慎，但最感動是收到很多同事的鼓勵，包括《聲秀》的導師與學員，還有過往合作過的監製，令她感受到滿滿的愛，問到緋聞男友羅天宇有否安慰她？她說：「佢有問候我，make sure我係OK。」她坦言之前的確很崩潰，甚至想過是否要就此退休，但很多人跟她說犯錯不要緊，最重要是不要失去信心，雖然她有自我懷疑，幸有大家的鼓勵令她重新振作。

#TVB[超话]#