2018年，我同「點滴」有咗環島泳呢個籌款挑戰構思後，離開游泳池十幾年的我，再次落返水，練咗一年半，喺2019年11月5日完成45公里環島泳後，我重新愛上返游水。從嗰日起，我就再冇停過，每星期三次朝早跟泳隊，6點幾起身練水，另外自己再游多三、四次。2020年，我返番去泳池比賽。2023年首次參加世界先進游泳錦標賽，喺福岡舉行。200米背泳得第六名，2分21秒，2024年多哈第二名，2分19秒， 到今日新加坡，第一次攞冠軍。雖然精彩但都有運氣。對手都好有名堂，有Maurizio Thesar ，佢本身實力比我强，係呢個組別嘅歐洲紀錄保持者，另外同場仲有2米高嘅巨人Stev Theloke，2000年他代表德國參加悉尼奧運（我都係），獲得兩面銅牌（我唔係），而我今次游出2分16秒，相差世錦賽大會紀錄1秒幾，都好好。我非常感恩，目標達成了。付出過嘅努力，幸運地，今次係有回報嘅。如果唔係環島泳，我諗我係絕對唔會再游返水。因為，我以為我係永遠唔會再鍾意返游水嘅，因為，我知道無論我點樣游，我都冇可能快過我以前啲時間。但其實唔一定係咁嘅，只要我肯放低我嘅一啲執着，淨係諗住做我自己鍾意做嘅事，咁樣開始，我就唔會有壓力，冇壓力就開心，開心咪繼續游囉，游得多咪會進步囉，起點低唔緊要㗎，個進步咪會仲明顯囉，咁有進步喇，個人咪會仲開心啲，咁都咁開心喇，咪會再練多啲囉，就係咁㗎喇。