下半區爭奪，今日凌晨結束曬兩場角逐。拜仁慕尼黑成為巴黎聖日門晉級嘅最大攔路虎，結果出來無論戰術運用以及身體素質對抗都有較明顯嘅分野。

巴黎最後剩餘9人迎戰，依然以2-0擊敗對手晉級準決賽。但不幸嘅係半場結束前，唐納勞瑪一次撲救當中「宅斷」咗梅斯亞拿左腳腳踝，導致重傷嚴重變形，幾日康復時間最少需要4-5個月。賽後隊長兼龍門嘅紐亞就指責唐納勞瑪嘅撲救動作過大，造成隊友嘅傷出。至於佢本人就喺74分鐘一次出迎中差點「老貓燒鬚」，被對手截擊射龍門但擦住而出。

不過避得過初一避唔過十五，杜爾78分鐘禁區頂嘅遠射加上奧斯文迪比利補時96分鐘嘅入波，令拜仁慕尼黑只能夠飲恨出局。高柏尼喺面對路爾斯安歷基未有太多破局嘅辦法，烏柏美簡奴同夏利卡尼兩次越位食詐糊都幾無奈，而包括京士利高文及奧利斯嘅埋門非差之毫釐就係被唐納勞瑪奮力化解。本場比賽亦都係拜仁功勳湯瑪士梅拿代表球會嘅最後一次上陣，祝福佢往後發展順利。而巴黎聖日門晉級之後，對手會係淘汰多蒙特嘅皇家馬德里，會係決賽前最重戲碼！

//勢估唔到尼高高華帶領嘅多蒙特能夠為沙比艾朗素製造唔少麻煩…

比賽佔據場上優勢兼主攻嘅皇家馬德里，10分鐘就有干沙路加西亞射入今屆賽事第4粒入波取得領先。10分鐘後，左翼嘅法蘭加西亞入多粒，皇馬帶住兩波優勢返更衣室。

最令人意想唔到嘅高潮，喺完場補時階段先風起雲湧。以為輸硬嘅多蒙特，喺92分鐘有比亞（Maximilian Beier）禁區頂位置射入收窄比數。麥巴比喺2分鐘後嘅入波再度以為可以殺死比賽，殊不知多蒙特中圈開波後隨即嘅反擊令侯辛禁區犯天條被逐兼吹罰十二碼，基拿斯操刀追成3-2！球證嘅「補多兩分鐘」令沙比薩幾乎「修成正果」，若非古圖爾斯飛到盡，分分鐘踢埋加時先分到勝負。

不過能夠睇多場摩特歷踢嘅皇馬賽事，相信球迷都收貨嘅！

#fifa club world cup#