玉郎周記
我的嗜好是甚麼？
答案好簡單—「煲劇」。因為煲劇可以睇到好多導演手法，鏡頭運用，演員演技，還有對白是否精練，其實煲劇可以吸收好多，學到好多，對於我編寫故事，創意上好有幫助，算得上是8成娛樂，2成工作，所以我是煲好多劇的。
好耐之前，日劇最受歡迎，最犀利，現已沒落了，韓劇亦威咗一輪，近年只偶有佳作，至於歐美劇這幾年都係麻麻哋，比較起來，國內的「陸劇」發展非常蓬勃，題材百花齊放，每年少算亦有四百部之多，良莠不齊的現狀必然有，一半以上未能播映，故此，能夠在網絡平台或電視上播映，水準一定唔差。「煲劇」需要成本，就是時間，所以我會先睇劇評，從中挑選，好睇才睇，時間寶貴嘛。
有3套劇，我認為好好睇，值得公諸同好，推薦俾大家。第一部《大奉打更人》，劇名就夠怪，「大奉」是乜冬冬？打更人，即係巡街保安？好難想像是何題材，卻因為好評如潮，忍唔住上網睇，睇完第一集，不得之了，呢套劇真係好正斗，追看性好强好强，睇咗就知，所謂嘅「打更人」，身份殊不簡單，是個非常特殊的官方單位，集玄幻、懸疑、奇案、奇情、武俠、神功，元素豐富，可觀性極高，放心，我當然唔會劇透啦，有興趣，快些看！
◆《大奉打更人》，導演：鄧科。領銜主演：王鶴棣、田曦薇、劉奕君、晏紫東。
第2部《蠻好的人生》，主要鍾意睇女主角「孫儷」，國內一位資深女演員，演技非常之好，劇中女主角意志堅強，能屈能伸好韌力，是位好拼命解決困難的時代女性，內容好寫實，發生在女主角身上的遭遇，令人產生共鳴，好容易同情她起來，主要原因是孫儷的演技，入木三分，只係睇孫儷已值回票價，呢套劇既寫實又輕鬆，好多情感投放戲，真係好睇，好正！
◆《蠻好的人生》，導演：汪俊。領銜主演：孫儷、董子健。
第3部《藏海傳》，男主角是現在國內頂流小生「肖戰」，亦是一部好評如潮的陸劇。不過，初初的風評並不看好，但後勁異常凌厲，超越晒同期所有劇集，成為冠軍，我當然唔會走寶，即刻揾嚟睇，《藏海傳》是古裝劇，故事好緊張，好緊凑，偵探元素極之豐富，充滿懸疑，男主角「肖戰」演出絲絲入扣，《藏海傳》每日上放2集，我忍唔住即刻睇，日日清，真頂癮！
◆《藏海傳》，總導演：鄭曉龍，導演：曹譯文。領銜主演：肖戰、張婧儀、周奇、黄覺。
以上3部劇，我認為《藏海傳》最好睇，提議大家有時間的話，不妨按照次序，先睇《大奉打更人》，再睇《蠻好的人生》，《藏海傳》留番最後欣賞，希望大家睇得過癮！

(取自網上圖片)

#漫画##玉郎漫漫king##天子传奇##神兵玄奇##神兵玄奇外傳##大圣未来##天龙八部##金著龍虎門##金龙##黄玉郎#