玉郎周記
好開心，因為金龍《黑白觀賞版》製成品已在我手，完全做到我心目中所想所要，認真Very Good。當然，亦有兑現「我生日，送禮物」的承諾，隨書有3張咭豪送俾大家，相信老友記們一定會鍾意。
《金龍》的封面圖，期期都鬼咁靚，用作做小咭素材，最是合適不過，印刷廠認真配合，選用最貴價的閃咭印製，攞上手細心欣賞，3張小咭閃閃生光，確實精美，之不過，就係精美過頭，原因封面圖縮成小咭已十分精細，太過閃令令，變咗有點天花亂墜，其實仔細睇真，公仔見肉色部位，是有偷位沒閃令令，如果突出成個公仔都偷位，只需畫面背景是閃咭效果，咁就冇咁眼花，效果最正斗啦。
金龍《黑白觀賞版》會繼續出，封面小咭會期期送，有咗經驗，大家可以放心，閃咭再唔會閃過櫳，款款都十全十美，送到你手。
關於送小咭，有讀者反映，佢竟然用咗$38買咗本《黑白觀賞版》。當然，《觀賞版》書價係值$38，不過只售$28，明碼實價益讀者，報販一時唔為意收多咗啫，冇心嘅，下次收錢同俾錢嘅都留心啲囉。亦有讀者詢問，買咗書但冇咭，點算好？咁啦，可以攞住本書到來玉皇朝補領，不另收費，交通費都係錢，老友記咁捧場，當然唔會再收錢，補送俾你啦。
再深入啲講吓《黑白觀賞版》，今期用咗厚書紙，我打算下期改用粉紙印刷，然後比較一吓，往後選用甚麼紙質效果最好，大家首先唔好諗多咗，我咁做並唔係為咗慳成本，書紙同粉紙紙價根本一樣，封面我已不惜工本用咗158克重磅卡紙，只求各位老友記攞書上手，感覺愉快良好，大呼過瘾，繼續繼續，支持支持，多多捧場！！
《殲滅羅剎篇》兩個重量級版本出世啦，同樣有禮物，有兩張靚靚閃咭隨書附送，唔係講笑，真係超級重手，有兩款封面，任君選擇，喜歡買晒兩本亦可，無任歡迎，之但係印量只有數百，要買到都唔係咁易，手快有手慢冇。首先介紹一吓《殲滅羅剎篇》有幾咁正，拉三頁超靚封面一定有，之前平庄本出現的錯錯漏漏，例如錯别字、分錯色諸如此類等等小瑕疵，全部一一修正，印刷方面，分别用上書紙和粉紙，作用是分類當中多樣內容，印像之中，共用兩種紙質的版別版書系是前所未有的嘗試，《殲滅羅剎篇》絕對是既量少又特别的完美版本，一個字——「正」！
《殲滅羅剎篇》仲有第三個版本，只有20本，點解數量得咁少？
第三個版本，白板封面，係俾我畫上親筆畫用嘅，畫王小虎又好，石黑龍、王小龍亦可，鍾意火雲邪神我都可以滿足嘅，但只送摯愛親朋珍藏，不過，我會留返一本，送俾老友記，至於點送法，用咩方式可以送出去，等我諗好咗就會在《金龍》書內公佈，下期再會！

#漫画##玉郎漫漫king##天子传奇##神兵玄奇##神兵玄奇外傳##大圣未来##天龙八部##金著龍虎門##金龙##黄玉郎#