玉郎周記
各位老友記，3月27日是我牛一好日子，同日咁啱就係《金龍》出書嘅日子，通常生日收禮物，今次剛好相反，我生日——「送禮物」，一於皆大歡喜。
送禮物都幾花腦筋㗎，諗咗好耐，終於諗返起《金龍》創刊號，有個「初稿完成版」，係我最鍾意嘅，裡面有我嘅真跡原稿、草稿，當中最正斗就係完成製作後的黑白線稿，線條粗幼分明，筆氣盡現，相比之下，彩色版遮蓋線條，線條感便大打折扣了。
我一直有這想法，將製作完成嘅黑白線稿，另外出本「黑白完成版」，之前做法是兩張稿一頁，縮細咗嘅，今次再正斗啲，一張稿一頁，更加傳神，經過一番努力，終於願望達成，可以做多個版本，提供俾老友記們選擇啦。
講番送禮物，即將推出嘅「黑白完成版」，會有一張非常之精美，金線印製嘅封面「小咭」送俾大家，因為創刊號是拉三頁封面，如果縮做一張小咭，咁就會好細好細睇得好辛苦，嘥咗，點好呢？終於最後决定，一分為三，賣大包，一送就送三張，合併起來就係創刊封面，呢份禮物，相信大家都會好滿意啦卦，哈哈哈！
因為送咭牽涉印刷，包裝流程，有需要趕早幾日稿配合，認真攞膽，不過有志者事竟成，終於趕到存稿，希望3月27日，老友記可以搶購到「黑白完成版」，攞到我送俾大家嘅禮物，希望你哋都鍾意。
講吓售價，既然係禮物，都係賣$28，冇另外加錢，「黑白完成版」同贈送嘅「小咭」，相當值得收藏，多謝支持，手快有手慢冇，希望大家搶得到啦！
唔止咁簡單，仲有超級正斗嘢，另外我會推出一本厚達四百幾頁，超重量級的特别版，係乜傢伙呢？開估，就係《殲滅羅剎篇》，有兩個封面版，內容包括有全篇內容，仲有所有草稿，只推出數百本用作紀念，想知道詳盡內容，可以留意今期廣告，就會有詳細介紹，呢本超重量級的特别版，數量甚少，一定仲難搶，因為印製時間特長，可能會遲一兩天才有得賣，老友記們要昅到實，最穩陣係去書屋訂購啦😄

#漫画##玉郎漫漫king##天子传奇##神兵玄奇##神兵玄奇外傳##大圣未来##天龙八部##金著龍虎門##金龙##黄玉郎#