前天下午，老娄正好到电视台附近办事，于是就约了两位老兄弟喝茶聊天。聊天的内容么，当然是我中国队最新的世预赛前景。

L：阿哥啊，侬觉着阿拉国家队接下来两场比赛，客场踢沙特主场踢澳洲，有希望伐啦？我听说足协内部放出来个风声是客场对沙特掿1分，下个礼拜两回到主场要争取赢澳洲！

我：啊？一胜一平掿4分？太乐观了伐？？？

C：是个呀！我前头阿哥侬还没来个辰光就勒帮L讲太乐观来。。。弄了勿好就是客场输拨沙特，主场对澳洲顶多打平掿1分。。。

L：有机会掿4分呃。。。现在迭个两支队伍，沙特也好，澳洲也好，侪勿灵呃。。。差勿多侪是历史上实力最差！尤其是沙特，之前6场小组赛一共只进了3只球，4场比赛呒没进球。。。

我赶紧点赞：兄弟可以呃！小组形势记了清清爽爽！但是，侬覅忘记沙特队一共只进了3只球，其中居然有2只就是对阿拉国家队进个呀。。。

C：就是呀。。。万一沙特主场一记头发逼疯呢？？？而且，阿拉主场肯定好赢澳洲吗？？？再讲来，现在从澳洲开始，5支球队分数屏了一道，大家心里厢侪抖豁了勿得了。。。

我：呒没错，大家侪紧张呃。。。所以阿拉看后天礼拜四个赛程就清爽了，澳洲主场对印尼辰光最早，接下去是日本主场踢巴林，阿拉中国队客场踢沙特是半夜里厢。也就是讲，对阿拉最理想个结果是澳洲印尼打平，阿拉客场赢沙特，个么阿拉就可以反超澳洲。

L：阿哥啊，侬迭个更加乐观来。。。

我：兄弟覅急，我还呒没讲光来！接下来是悲观结果。假使澳洲赢了印尼，澳洲就是10分。也就是讲半夜里厢阿拉交沙特还呒没开打就已经落后澳洲4分了，就算从沙特身廊厢掿到1分，还是要差澳洲3分。个么下个礼拜两主场踢澳洲侬讲讲看，心里厢阿是要更加紧张、更加抖豁？？？

C很细心地找出了礼拜四的赛程：澳洲对印尼，17:10开球。日本--巴林，18:35开球，沙特--中国，半夜里02:15开球。要死快来，同一天里厢好坍板介许多辰光啊？？？

我：迭个呒没办法，亚洲地方大呀。。。澳洲现在夏令时，比阿拉早三个钟头。沙特要比阿拉晚五个钟头，而且伊拉伊面侪是夜到9点钟以后开始踢比赛。所以我判断澳洲老有可能主场赢印尼，接下来定定心心看阿拉交沙特对拼。。。假使真个礼拜四踢好以后澳洲领先阿拉3到4分个闲话，个么下个礼拜两澳洲到杭州来打客场只要守牢1分就足够来。。。

L沉吟良久：阿哥啊，侬迭个分析太悲观！阿拉国家队还是有希望呃。。。

我大笑：兄弟啊，阿拉当然侪希望国家队有希望呃咯。。。但是，人家看到阿拉国家队也觉着有希望呃呀，对伐？？？