玉郎周記
神來伏筆
講吓《金龍》，經常會碰上FANS，都會談及「火雲邪神」，係咪死咗㗎？有部份老友記估佢肯定會翻生，冰封火雲邪神，就係方便可以復出咁話。
我知道老友記們好鍾意邪神，死咗，實在唔捨得，好希望佢可以復活，死咗又翻生，龍虎門過往亦有幾個經典角色係咁，睇怕邪神亦唔會例外。
我個人覺得「翻生」已死角色，唔係一件好事，死就死咗，值得懷念，代表火雲邪神呢個角色好成功。
火雲邪神只練到易筋經「白級」，未到至高境界「黑級」，霸腿最厲害一式「殺招」——石破天驚氣蓋世，邪神未有機會施展，算係邪神嘅遺憾，亦係我刻意留下嘅伏筆……。
至於將來會唔會出現一個新人物，同邪神一樣咁有氣勢，咁有吸引力，又「神」到可以練成易筋經「黑級」，可以踢出霸腿「殺招」，有冇一個咁「神」嘅人呢？你問我，我都未知，哈哈哈！
大家繼續捧場啦，《金龍》有好多好好睇嘅故事，等住大家欣賞，至於有冇一個比邪神更勁揪嘅角色出現呢，暫時未會嘞，將來就唔敢擔保，點到好，好多謝大家對《金龍》嘅支持！

自强不息
香港呢幾年確實麻麻哋，市面未算蕭條，已不復昔日繁榮，做生意，難做咗好多，而我個人認為，乜都係事在人為。
我親眼所見，天后有間「A嫂清湯牛腩麵」，門口經常有二、三十人排隊揾食，不知幾好生意。灣仔又有一間叫做「B嫂清湯牛腩麵」，門口無人嘅，舖內只得五枱客，嗱，大家都係清湯牛腩麵，點解有間客似雲來，另一間就冷清清，拍烏蠅，多客自然揾大錢啦，所以我話事在人為，就係咁解。
我親自去食西環嚐喜煲仔菜，我坐低食，門口排住卅幾人，8點幾食完，排隊等食依然仲有廿幾人，咁就證明好食，只要出品好，生意就一定好，生意唔好自不然有未改善嘅原因。
生意好與壞，我個人認為要講求「自强不息」，市況唔好，無論做老闆也好，做打工仔也好，都要更加努力，力求上進，咁就一定比Hea住做，唔努力嘅優勝，鶴立雞群，贏口碑，賺真銀，該賺就越賺越多，大家記住努力啦！
正如《金龍》，真係花好多努力心力，又好似邱福龍嘅《龍神》，同樣好努力，呢兩本新書銷量，相比之前多出50%，證明「用心」，「努力」，必然有回報嘅，咁就大家一起努力，一起發財，共勉之！

#漫画##玉郎漫漫king##天子传奇##神兵玄奇##神兵玄奇外傳##大圣未来##天龙八部##金著龍虎門##金龙##黄玉郎#