本周二，晚上，娄老师继续和家里面女同志一起追《繁花》。

突然有朋友来电：老娄啊，侬看了伐？央视一套专题节目，李铁陈戌源出来坦白来！哦哟，迭个陈主席哦，哭得来眼泪水刹也刹勿牢。。。

我略有些鄙夷：啊？？？朋友，迭个节目侬也看啊？？？侬有空哦。。。覅影响我看《繁花》好伐？今朝最后两集，大结局，晓得伐啦？

友人：唉呀，我晓得嗰呀，我就是想等到《繁花》30集全部出来再看嗰呀。所以今朝老认真勒嗨看李铁陈戌源呀！我就是想问问侬之前弗是有图片出来讲李铁头发侪拨剃光了吗？哪能呒没剃光啦？伊吹头发还吹伐啦？

我：哈哈哈，侬迭只问题我身边交关人侪来问过。。。我只好讲吹头发是李铁人生转折嗰一种标志！吹头发之前是大家最初印象当中嗰李铁，吹头发之后就是另外一个新李铁来。。。

友人：哦哟，老娄，侬迭个结棍嗰，一记头掿前后两个李铁分了清清爽爽了！有眼道理。。。前头一个是相对单纯嗰球员，后头一个就是现在出来认罪忏悔嗰国家队主教练。。。

我：是呀。。。小辰光看《三国演义》，印象深刻嗰一段就是孙权上书曹操劝进。结果曹操哈哈大笑帮手下头人讲“是儿欲使吾居炉火之上耶”！记得伐？摆到李铁陈戌源身廊一样好用，足协主席国家队主教练就是只火炉呀，坐上去就是拨火来烤嗰！侬是真金，烤也烤勿坏。个么迭个世界廊厢有几个人是真金啦？是弗怕烤嗰啦？？？

友人长叹一声：唉。。。我真嗰呒没想到一个足协主席，一个国家队主教练，居然好收钞票收到搿重程度！而且还是勒嗨前头介许多前主席前副主席拨捉脱以后。。。迭个太吓人了。。。真个是只要下头有人敢送，上头就有人敢收，一点点也弗慌张。。。

我：所以啊，迭个就是诱惑呀，大到侬呒没办法想象，大到侬呒没办法抗拒，大到侬横下一条心帮自家讲——cn！老子拼了！前头几只戆大好收我为啥弗好收？火炉？弗坐到搿只火炉廊厢我还呒没收嗰机会来。。。我就弗相信我运道介差！

友人又长叹：唉。。。个么就呒没办法彻底解决吗？

我：哈哈哈，我只好讲李铁坏就坏了头发长，有得吹。假使伊像我一样留只板刷头，头发没得吹，个么也就用勿着去坐迭只火炉，用勿着上央视一套认罪忏悔来。。。

友人大骂：滚！！！

挂断电话，突然想起《繁花》第二集结尾处，夜东京饭桌上，葛老师领唱沪剧《昨夜情》选段：忏悔的泪水盈满眶。玲子冲入画面：昨夜情，今朝思。千古恨。。。（咬牙切齿，还带笑）

马伊琍演得真好！影后级！