香港而家嘅市道，係㗎，都真係幾差嘅。

股市差、樓市差、大家嘅消費意欲都非常差，
受到影響嘅，唔單只係飲食同消閑行業，
個牽連其實係關乎到我哋每一個小市民。

以下係我小小嘅個人愚見：

作為打工仔嘅，唔好再覺得自己份工會好穩陣，
一定要諗方法，令到自己再勁啲，再好啲，
最簡單同最直接嘅就係去學習進修增值自己，
例如你係做Sales嘅，請你真係去買本書甚至上吓堂，
或者上網睇吓關於呢方面嘅教學短片，
去學吓銷售技巧同說話技巧等等嘅技能，
如果身邊嘅人不斷進步，你就原地踏步，
最後被淘汰嗰個，好大機會就係你。

另外，工餘嘅時候，搵多一至兩份自己有興趣，
而能力同時間都可以應付到嘅兼職去做，
除咗可以搵多啲錢傍吓身之外，
得到嘅相關經驗同埋開拓到新嘅人脈，
呢啲都係喺日後自己職業生涯上好重要嘅籌碼。

做老闆嘅，真係唔好諗住繼續食老本嘞，
無論你係做緊邊一辦生意都好，
假設你係做緊飲食業生意嘅，開餐廳嗰啲嘅，
如果過去呢段日子嘅生意唔好，
不如認真研究吓，點解會係咁？
當然你一定會有好多唔同嘅原因同埋理由，
例如經濟唔好，好多人飛咗或者返內地消費等等，
講真嘅，呢個當然係有一定程度嘅影響啦，
但係有冇諗過可能係同你哋嘅經營有關呢？
例如食物質素同服務水準，係咪越做越衰呢？
宣傳推廣嗰啲，有冇嘗試去做過吓呢？
如果有，又有冇得再做好啲呢？

好老土嘅一句說話，我只係覺得，辦法總比問題多，
咩都唔做，坐喺度，肯定好快收皮，
但係如果你肯改變，都仲有機會搵到出路。

記住呢句說話：
If you change，everything will change for you

與其投訴同抱怨呢段時間失去左啲乜，唔見咗啲乜，
或者仲期望有啲乜嘢政策或者措施嘅出現，
不如諗吓自己呢一刻仲有啲乜，然後盡力再做好啲，
世界上面唯一能夠百分百相信嘅，只有自己。

大家真係要頂住，無論如何，都要撐住！

一齊加油。