日本飛行訓練總結：

本來今次搞飛行訓練，係應學生要求，畢竟困喺香港太耐，真係想出去鬆一下，而且亦對訓練進度有明顯幫助。以訓練角度，撇除使費及距離各樣，始終都係台灣比較有效率。可惜台灣政策玩嘢，我本來打算取消或押後，但係有幾位同學異口同聲，＂阿sir，日本都殺啦，橫掂都攞咗假咯＂但日本需要聯絡同籌備，而且要先同日本方面打招呼及幫大家搞牌。可能安排上，我哋未知到實際預算總數，大家比初期預算嚇親，開始有人縮沙，之後火燒森林一樣。最仆街嘅係，當初死哎難哎，係都話要我搞去日本嗰兩個，到我哋訂好晒機票先至話唔去。我的確失望，啲兄弟買晒機票，我又冇得唔理佢哋，唯有照去。不過，好在今次整個旅程超越我預期的＂超正！＂首先錯有錯着，本來我打算淨係飛富士山嘅朝霧高原，因為嗰度降落係最容易，所以選擇喺嗰度長住一間酒店。只係飛一個場地。但係去到之後發覺，富士山範圍一帶大大小小有10幾個飛行場地，加上我點都有啲江湖地位，邊度好風，就去邊度，多謝日本方面各大高手都熱情招待，每日update飛行天氣資訊結果，我哋去咗咁多日，只係一日飛唔到，而且係一早話晒邊度都飛唔到，所以疊埋心水去東京行吓，而我哋間酒店咁啱就係新幹線車站旁邊，搭車去東京都係個零鐘頭。按照我以往訓練安排，包括飛唔到嘅Backup計劃，日本富士市，係最理想。食詐糊機會低，就算食詐糊，都有大把地方去，而且更適合各位同學帶埋自己老婆女朋友二奶三奶，隨團跟足又得，中途離隊或自己喺東京玩完再嚟一齊玩都得。所以決定可以開放比其他想去玩嘅唔識飛朋友。而今次旅程最重要係，今次行程，大家都係因為本來預計唔到嘅費用嚇到腳軟，但事實完全相反，基本上衣食住行係非常平，酒店包早餐，而且我哋去嘅地方大部份都冇嘢食，大家亦唔會開開心心飛緊，唔玩去食飯，所以我哋每日喺酒店食飽早餐之後，都會攞多個飯盒帶埋去食住先，再喺途中七仔買啲嘢食，即係話，我哋每日早餐午餐都係免費，淨係食夜晚嗰餐，就算我哋食好啲，基本上一餐最多都係兩三千円左右，即係舊零水港紙，喺香港，爭先都唔得啦！今次有去嘅同學，尤其華哥、安哥，的確有明顯進步，而且全部人都happy。所以我決定以後去日本嘅運作都係決定逗留喺富士市，到時候再按照現場情況再決定，我同當地陀地研究過，每年最佳月份，五月同十一月。最後真係要多謝，日本大師給師傅幫忙，淨係佢哋比了我已經慳咗好多冤枉路。

再度、感謝します

宮田步さん
大竹口昌輝さん
松下知彥さん
鈴木信幸さん（校長） http://t.cn/A6KyHyEE