安心

茶水间阿姐都笑Calvin係“Sylvia magnet”——Sylvia去边，Calvin嘅心就去边。佢自己都认，冇计㗎，只要Sylvia喺身边，个心就踏实，好似所有嘢都归位噉。

呢个礼拜，Sylvia去咗上海出差，一走就係成个星期。Calvin第一天有应酬还好，忙起上嚟都唔记得咁多，第二天夜晚就开始喺屋企对住部电视发呆，望住旁边空荡荡嘅梳化，忽然觉得成间屋静得离谱。拎起电话想打畀Sylvia，睇住个屏幕睇咗好耐，最后都係放低——佢知Sylvia出差好忙，唔想打扰佢休息。

但个心真系好挂住佢咯。

第三日，Calvin返公司，埋首将手头上紧要嘅嘢全部处理好，会议一个接一个开，文件叠到成座山咁高。加紧安排好几日嘅工作，为可以走开去搵Sylvia。

好多人觉得Calvin呢个人好复杂，做事果断凌厉，经常不按套路出牌。但其实佢自己知，自己好简单，最紧张嘅得两个人：一个係妈妈，一个係Sylvia。Calvin嘅安心，就係妈妈健康开心，Sylvia喺自己身边。

嗰晚，Calvin有应酬，饮到成凌晨一点先散。佢成身酒气，攰到眼都擘唔大，返到屋企攞起芬姐提前执好嘅背囊，冲咗个冻水凉令自己醒神啲，凌晨四点就赶去机场。成个过程佢冇犹豫过，好似呢件事係一定要做嘅，连机票都係喺的士上先至用电话订好。

凌晨四点嘅机场好静，静到可以听到自己心跳声。Calvin坐喺候机室，攰到合埋眼就瞓著咗，但个心係暖嘅——因为几个钟之后就会见到Sylvia。

清晨七点几，Calvin企喺Sylvia房门口，感受到自己嘅呼吸。

敲咗几下门，门后传来Sylvia矇矓嘅声音：“边个啊……”

门打开嗰一刻，Sylvia仲係半梦半醒，头髮乱糟糟，眼瞇瞇噉望出嚟。然后佢睇到Calvin企喺门口，背囊挂住一边膊头，成身风尘仆仆，眼中係藏唔住嘅疲倦，但同时又有一种好幸福嘅光。

Sylvia呆咗呆，未开口问，Calvin就笑了。

“早森，老婆仔。”

Sylvia怔怔噉望住佢，心入面忽然一阵暖流过晒成身。佢知Calvin呢几日好忙，寻晚仲要应酬到凌晨，而家天光都未透就飞到上海——其实佢都係想见到自己啫。

“做乜咁傻㗎……”Sylvia把声仲係沙沙嘅，但手已经好自然拉住Calvin入房。

Calvin入到房，放低背囊，成个人好似散咗架噉。同Sylvia讲：“畀我冲个凉先，成身汗。”

冲完凉出嚟，换咗件干净T恤，成个人扑到床上面，摊开手脚，终于可以唞返啖气。Sylvia坐喺床边，轻轻帮佢抹头髮，Calvin侧过脸望住佢，忽然伸手捉住佢只手，放喺心口度。

“终于踏实晒。”佢细声讲，眼瞇瞇笑住，声音细细哋，好似讲畀自己听多过讲畀Sylvia听。

Sylvia望住佢，心入面软到一塌糊涂。佢知Calvin从来唔会讲好多浪漫说话，呢个人嘅爱，係用行动去表达嘅。佢会凌晨飞过嚟，佢会安排好所有嘢静静出现，佢会攰到趴低都要先见到自己一面。

“傻嘅，咁远飞过嚟，就为咗瞓觉？”Sylvia口硬心软，但隻手轻轻摸住Calvin额头。

Calvin合埋眼，嘴角仲係翘起，轻轻讲咗句：“就係要见到你先得。”

好快，Calvin就瞓著咗。呼吸变得好均匀，头髮仲有少少湿，隻手一直捉住Sylvia隻手冇放开过。Sylvia望住佢瞓觉嘅样，忽然谂起以前嘅事——

Calvin平时做起事来雷厉风行，公司上下冇一个唔服。但偏偏喺Sylvia面前，佢就会变返细路仔——唔係嗰种幼稚嘅细路，而係嗰种……好需要攞返个安全岛嘅细路。

还记得以前系澳门，妈妈睡着之后，佢班人揸车去深圳，赶去直升机场。凌晨时分，坐上直升机，飞往青岛。外面係无边无际嘅黑，得螺旋桨声。佢喺飞机上合眼瞓一阵，到咗青岛，办完要办嘅事，天都未光透，又即刻飞返香港，落机直接返公司开会。同事见佢精神奕奕坐喺会议室，根本唔知呢个人刚刚完成咗一次来回几千公里嘅“午夜狂奔”。

嗰种行程，攰唔攰？攰到癫。

Calvin唔係铁打嘅，佢都会攰，会眼瞓，会腰骨痛，会想摊喺张床度唔郁。但佢觉得，有d事值得做，有d人值得见，咁攰就攰啦，冇所谓。

但为Sylvia，唔係“值得”咁简单，而係“冇得拣”。因为佢根本忍唔住。

d朋友成日笑佢：“咁大个人，离开Sylvia几日就周身唔聚财？”

Calvin每次都笑笑口，唔反驳。就好似人哋问“点解要饮水”，你唔会解释一大轮，因为饮水係本能。

Sylvia就係佢嘅本能。

所以朝早，当Sylvia打开酒店房门，见到Calvin一身风尘、攰到眼袋都出晒嚟、但一见到佢就笑到好似执到金嗰样时，Sylvia心入面乜都明晒。

Calvin啊，为咗责任可以去到好尽，为咗Sylvia，可以去到更加尽。

窗外上海嘅晨光慢慢变亮，Sylvia帮Calvin盖好被，自己都挨喺床边慢慢再瞓过去。两个人喺酒店房间，冇烛光晚餐，冇浪漫告白，但呢种踏实嘅感觉，比咩都来得真实。

呢个就係Calvin爱Sylvia嘅方式。每一步都行得好真。

唔关大唔大人嘅事。

只关嗰个人，係唔係Sylvia。